ახალი ამბები
3 თებერვალი, 2012
რეგიონული განვითარებისა და ინფრასტრუქტურის სამინისტროს, გაერთიანებულმა წყალმომარაგების კომპანიამ ფოთში საინვესტიციო პროგრამის გარემოზე ზემოქმედების პროექტი განიხილა.
პროექტი მიზნად ისახავს ფოთის ჩამდინარე წყლების გამწმენდი ნაგებობისა და მაგისტრალური საკანალიზაციო კოლექტორის მშენებლობას. შეხვედრას გაერთიანებული წყალმომარაგების კომპანიის წარმომადგენლებთან ერთად ადგილობრივი მოსახლეობა და ქალაქ ფოთის მერიის წარმომადგენლები ესწრებოდნენ.
პროექტი აზიის განვითარების ბანკის მიერ არის დაფინანსებული და ხორციელდება საქართველოს გაერთიანებული წყალმომარაგების კომპანიის მიერ. ჩამდინარე წყლების გამწმენდი ნაგებობა დაპროექტდება გერმანული სტანდარტების (DWA) შესაბამისად.
პროექტის განხორციელების შემდეგ ფოთის მოსახლეობა მაღალი ხარისხის სამელ წყალს შეუფერხებლად მიიღებს და ასევე გასუფთავდება ჩამდინარე წყლები .
25 იანვარი, 2012
საქართველოს რეგიონული განვითარებისა და ინფრასტრუქტურის მინისტრმა რამაზ ნიკოლაიშვილმა, გაერთიანებული წყალმომარაგების კომპანიის დირექტორთან ირაკლი კვაშილავასთან ერთად, ქუთაისში, გაერთიანებული წყალმომარაგების კომპანიის მომსახურების ახალი ცენტრები და რეაბილიტირებული სკვერი გახსნა.
აღნიშნული ცენტრი მოსახლეობას ერთი ფანჯრის პრინციპით მოემსახურება და საშუალებას მისცემს აბონენეტებს ოპერატიულად მიიღონ ნებისმიერი სახის ინფორმაცია ქუთაისის წყალმომარაგების სისტემაში არსებული მდგომარეობის შესახებ. წყალმომარაგების კომპანიის დირექტორმა ირაკლი კვაშილავამ რეგიონული განვითარებისა და ინფრასტრუქტურის მინისტრს, რამაზ ნიკოლაიშვილს კიდევ ერთი ახალი საინფორმაციო ცენტრიც გააცნო, რომელიც ავტოქარხნის დასახლებაში მდებარეობს და რომელსაც ცენტრალურ ოფისში არსებული სერვის ცენტრის ანალოგიური ფუნქცია აქვს.
გაერთიანებული წყალმომარაგების კომპანიის დირექტორი ირაკლი კვაშილავას განცხადებით, მსგავსი საინფორმაციო ცენტრები ქვეყნის მასშტაბით სხვადასხვა რეგიონში გაიხსნება. ამით წყალმომარაგების კომპანიასა და მოსახლეობას შორის კომუნიკაცია გამარტივდება. რეგიონული განვითარებისა და ინფრასტრუქტურის მინისტრმა რამაზ ნიკოლაიშვილმა პირადად შეამოწმა ახალ საინფორმაციო ცენტრში მომსახურების ხარისხი. ქუთაისის ფილიალის მიმდებარე ტერიტორიაზე თანამედროვე სტანდარტების შესაბამისი სკვერიც მოეწყო, რათა კომპანიაში მოსული აბონენტი საკუთარ ჯერს კეთილმოწყობილ და კომფორტულ პირობებში დაელოდოს.
23 იანვარი, 2012
დღეს საქართველოს გაერთიანებული წყალმომარაგების კომპანიის რეგიონების და სერვის ცენტრების მენეჯერები კომპანიის დირექტორს, ირაკლი კვაშილავას და რეგიონული განვითარებისა და ინფრასტრუქტურის მინისტრის მოადგილეს, ჯამბულ ბაკურაძეს შეხვდნენ.
შეხვედრაზე განიხილეს არსებული პრობლემები, მათი გადაჭრის გზები და სამომავლო გეგმები. კონკრეტულად საუბარი შეეხო 2012 წელს დაგეგმილი ისეთ ღონისძიებებს, როგორიცაა ტექნოლოგიების და ელექტრონული დოკუმენტ-ბრუნვის დანერგვა, საზოგადოებრივი ტუალეტების მშენებლობა. კომპანიის დირექტორმა მნიშვნელოვნად გამოჰყო სამშენებლო-სარეაბილიტაციო სამუშაოები, რომლებიც წყალმომარაგების პირობებს გააუმჯობესებს რეგიონებში.
12 იანვარი, 2012
საქართველოს გაერთიანებული წყალმომარაგების კომპანიამ 2012 წლის 11 იანვარს გრანულომეტრიული აპარატი შეიძინა, რომელიც წყლის შემცველი ნაწილაკების რაოდენობის და ზომების დადგენის საშუალებას იძლევა.
აღნიშნული დანადგარი კომპანიას დაეხმარება წყლის გამწმენდი ნაგებობის ფილტრის და სალექარის რეალური ზომების შერჩევაში, რაც, თავისმხრივ, პროექტირების სრულყოფილად შესრულებაში შეიტანს წვლილს და მნიშვნელოვნად გაზრდის აბონენტებისათვის მიწოდებული წყლის ხარისხს.
10 იანვარი, 2012
დღეს, წყალმომარაგების კომპანიის დირექტორმა ირაკლი კვაშილავამ, საქართველოს რეგიონული განვითარებისა და ინფრასტრუქტურის მინისტრს რამაზ ნიკოლაიშვილს და ქვემო-ქართლის გუბერნატორს დავით კირკიტაძეს მარნეულის წყალმომარაგების სისტემაზე მიმდინარე სარეაბილიტაციო სამუშაოები გააცნო.
წყალმომარაგების საკითხი მარნეულში წლების მანძილზე გადაუჭრელი პრობლემა იყო. სარეაბილიტაციო სამუშაოების დაწყებამდე მარნეულის 35 ათასამდე მოსახლე წყალს, ყოველ მეორე დღეს 4 საათიანი გრაფიკით იღებდა.
მარნეულის წყალმომარაგების სისტემის რეაბილიტაციას, ევროპის საინვესტიციო ბანკის დაფინანსებით, საქართველოს რეგიონული განვითარებისა და ინფრასტრუქტურის სამინისტროს გაერთიანებული წყალმომარაგების კომპანია ახორციელებს. პროექტის ფარგლებში აშენდა წყლის ერთი სატუმბი სადგური, ხოლო მეორე მშენებლობის პროცესშია. წყლის სათავე ნაგებობაზე მიმდინარეობს სადრენაჟე სისტემის მოწყობა. ასევე, 600კუბურ მეტრიანი რეზერვუარის მშენებლობა.
სარეაბილიტაციო სამუშაოების დასრულების შემდეგ მარნეულის მოსახლეობა სუფთა და ხარისხიან წყალს ყოველდღიურად 7-8 საათიანი გრაფიკით მიიღებს. პროექტზე 30-მდე ადამიანი დასაქმდა, რომელთა უმრავლესობა ადგილობრივი მოსახლეა.
9 იანვარი, 2012
26 დეკემბერი, 2011
დღეს, სასტუმრო "რედისონში" საქართველოს გაერთიანებული წყალმომარაგების კომპანიამ რეგიონული განვითარებისა და ინფრასტრუქტურის სამინისტროსთან ერთად 2011 წელს წყალმომარაგებისა და წყალარინების სიტემაში ჩატარებული სამუშაოების შედეგები შეაჯამა.
მოწვეულ სტუმრებს, გაერთიანებული წყალმომარაგების კომპანიის დირექტორმა ირაკლი კვაშილავამ ჩატარებული სამუშაოს შედეგები პრეზენტაციის სახით წარუდგინა და 2012 წლის გეგმები გააცნო.
2011 წელს რეგიონული განვითარებისა და ინფრასტრუქტურის სამინისტროს გაერთიანებული წყალმომარაგების კომპანიამ, წყალმომარაგების სფეროში მასშტაბური სამუშაოები განახორციელა, რის შედეგადაც საქართველოს რეგიონებში წყალმომარაგება საგრძნობლად გაუმჯობესდა. რამდენიმე ათეული მუნიციპალური ცენტრი გადაყვანილი იქნა ყოველდღიურ, ხოლო მუნიციპალიტეტების ნაწილი, უწყვეტ წყალმომარაგებაზე გადავიდა.
სწორედ 2011 წელს დაიწყო, აზიის განვითარების ბანკის მიერ გამოყოფილი 500 მლნ. აშშ დოლარის ათვისება. აღნიშნული თანხით ქუთაისის, ფოთის, ზუგდიდის, ანაკლიის, მესტიისა და ურეკის წყლისა და საკანალიზაციო სისტემების მშენებლობა-რეაბილიტაცია განხორციელდება. პარალელურად, ევროპის საინვესტიციო ბანკის ეგიდით წელსვე, დაიწყო 40 მლნ. ევროს ღირებულების სამუშაოების ჩატარება საქართველოს 26 მუნიციპალიტეტში უწყვეტი წყალმომარაგების მიზნით.
რაც შეეხება 2012 წელს, დამდეგი წელი გარდამტეხი წელი იქნება საქართველოს რეგიონებისათვის წყალმომარაგების გაუმჯობესებისა და წყლის მიწოდების ყოველდღიურ რეჟიმზე გადასვლის თვალსაზრისით.
22 დეკემბერი, 2011
წყალმომარაგების სისტემებზე არსებული ავარიების გამოვლენა და აღმოფხვრა დღეიდან უფრო ოპერატიულად მოხდება. რეგიონული განვითარებისა და ინფრასტრუქტურის სამინისტროს გაერთიანებული წყალმომარაგების კომპანიამ 15 ერთეული "ფიატის" მარკის ავტომობილი შეიძინა. აქამდე გაერთიანებული წყალმომარაგების კომპანიის საავარიო ბრიგადებს მსგავსი სახის ტექნიკა საკმარისი რაოდენობით არ ჰქონდათ, რის გამოც დაზიანებების აღმოფხვრა გვიანდებოდა. აღნიშნული ავტომობილები ყველა რეგიონულ ფილიალს გადაეცემა. მათი საშუალებით, საავარიო ჯგუფები დაზიანებების გამოვლენა-აღმოფხვრას ოპერატიულად შეძლებენ, რაც კომპანიის მომსახურების ხარისხს მნიშვნელოვნად გააუმჯობესებს. როგორც საქართველოს რეგიონული განვითარებისა და ინფრასტრუქტურის მინისტრმა რამაზ ნიკოლაიშვილმა აღნიშნა, გაერთიანებული წყალმომარაგების კომპანიის თანამედროვე ტექნიკური საშუალებებით აღჭურვა ძალიან მნიშვნელოვანია იმისათვის, რომ მივაღწიოთ დასახულ მიზანს, რასაც საქართველოს რეგიონების ყოველდღიური წყალმომარაგება ქვია. 2012 წელი ამ თვალსაზრისით გარდამტეხი წელი იქნება.
17 დეკემბერი, 2011
დღეს, მცხეთაში წყალმომარაგებისა და წყალარინების დარგში დასაქმებული ადამიანებისათვის სპეციალური ტრენინგ ცენტრი გაიხსნა. აღნიშნული ცენტრი საქართველოს გაერთიანებული წყალმომარაგების კომპანიის ორგანიზებით, მცხეთის მომსახურების ცენტრის ბაზაზე აშენდა.
ტრენინგ ცენტრში საქართველოს გაერთიანებული წყალმომარაგების კომპანიის თანამშრომლები თანამედროვე ტექნოლოგიების დაუფლებას და კვალიფიკაციის ამაღლებას შეძლებენ. სპეციალისტთა გადამზადება, კომპანიის პრიორიტეტების გათვალისწინებით მოხდება.
ტრენინგ ცენტრის მშენებლობასთან ერთად, მცხეთაში ასევე განხორციელდა 30 ადამიანზე გათვლილი სასტუმროს ტიპის სახლის მშენებლობაც, სადაც რეგიონებიდან ჩამოსული მსმენელები ღამის კომფორტულად გათევას შეძლებენ. ტრენინგ ცენტრის შენობა და მიმდებარე ტერიტორია მსმენელებისთვის, როგორც თეორიული, ასევე პრაქტიკული მეცადინეობების ჩატარების საშუალებას იძლევა.
ტრეინინგ ცენტრი დღეს, საქართველოს რეგიონული განვითარებისა და ინფრასტრუქტურის მინისტრმა - რამაზ ნიკოლაიშვილმა, საქართველოს გაერთიანებული წყალმომარაგების კომპანიის დირექტორთან - ირაკლი კვაშილავასთან ერთად გახსნა.
16 დეკემბერი, 2011
დღეს, საქართველოს გაერთიანებული წყალმომარაგების კომპანიისა და წითელი ჯვარის საერთაშორისო კომიტეტის ურთიერთ თანამშრომლობის ფარგლებში კომპანიას უსასყიდლოდ გადმოეცა 17 632 შვეიცარიული ფრანკის ღირებულების ლაბორატორიული აღჭურვილობა, ქიმიური რეაქტივები და მასალები, რომელიც წყლის ხარისხის მონიტორინგისთვისაა განკუთვნილი.
წითელი ჯვარის წარმომადგენლობასთან შეხვედრისას კომპანიის ხელმძღვანელობამ სამომავლო თანამშრომლობის საკითხები განიხილა და ხელი მოაწერა ლაბორატორიული აღჭურვილობისა და ქიმიური მასალების გადმოცემის ხელშეკრულებას. Aასევე მომავალი წილიდან დაიგეგმა საქართველოს გაერთიანებული წყალმომარაგების კომპანიის მშენებელ-ინჟინერთა ტრეინინგი EPANET-ის საინჟინრო პროგრამაზე.
EPANET-ში სპეციალურად ამ ტრეინიგისთვის წითელი ჯვარის წარმომადგენლობა გეგმავს აღნიშნული პროგრამის სპეციალისტის შვეიცარიიდან მოწვევას. ლექციები რამოდენიმე დღის განმავლობაში ეტაპობრივად ჩატარდება, რის შემდეგაც ინჟინრები სპეციალურ სერტიფიკატებს მიიღებენ.
